Actividade Tema 4 - Boas prácticas en innovación educativa con TIC

Exercicio de Teoría do tema IV

A continuación expoñemos 3 experiencias de innovación educativa con TIC para Educación Primaria.

BOAS PRÁCTICAS EN INNOVACIÓN EDUCATIVA CON TIC
Título da experiencia			I+D Media 3.0
Autoría	David Barrán Ferreriro é mestre de Ciencias Sociais no CPR Plurilingüe Calasancias do municipio coruñés Estrada dos Fortes.
	Páxina web (URL)	Colexio Plurilingüe Calasancias. http://colexiocalasancias.es/proxectos/
	Artigo, publicación (indicar localización)	Trátase dun artigo que figura na páxina web do propio centro educativo, no que se ilustra o proxecto e se ofrece un vínculo para poder ollar o produto resultante do proxecto.
Destinatarios	A narración da experiencia está destinada a todas as persoas que teñan acceso á mesma, ou queiran coñecer os procederes do propio centro. Os encargados de lavala a cabo foi o  alumnado de primaria e secundaria.
Describe brevemente a innovación tecnolóxica	Fai refencia ó uso das tecnoloxías da información ( Mobile Learning, Realidade Aumentada Blippar, 1-2-3D Cacht e espazos colaborativos a través de Onedrive) para descubrir e traballa-los contidos. O resultado foi unha revista en formato dixital e papel na que se plasmou todo o traballo realizado dentro e fóra da aula. Empregaron a aplicación de realidade aumentada Blippar para vincula-las imaxes ou fotografías con vídeos, páxinas web, etc.
Describe brevemente a innovación metodolóxica	Trátase dun proxecto interdisciplinar, no que se abarcaron contidos das áreas de  Inglés, Historia, Relixión, Matemáticas, Lingua e Economía, tendo como fío condutor a Idade Media: o románico, o gótico, a sociedade, a política e a economía medieval, a transmisicón de valores e crenzas mediante o arte, contextualizado na cidade de A Coruña. A innovación tecnolóxica foi acompañada dunha variada innovación metodolóxica que deixou pouco espazo para a educación transmisiva á que estamos acostumados. Como novidade máis interesante, destaca-la metodoloxía Flipped Classrom ou o manexo de espazos colaborativos. Todo isto fomentado a través de técnicas de traballo cooperativo.
Outros datos de interese	O proxecto tivo unha duración de seis meses.

BOAS PRÁCTICAS EN INNOVACIÓN EDUCATIVA CON TIC
Título da experiencia			Aula de Elena
Autoría	Elena Pintado Málaga (Mestra en educación primaria, profesora de piano, musicoterapeuta e especialista universitaria en coaching e educación emocional para a excelencia educativa)
	Páxina web (URL)	Aula de Elena http://www.auladeelena.com/
	Artigo, publicación (indicar localización)	Trátase dun blog que se pode localizar a través de calquera motor de busca de internet.
Destinatarios	A autora afirma que a páxina ten como obxectivo dar a coñecer as súas ideas e experiencias educativas, tendo como primeira consecuencia directa a conexión da realidade da aula con pais e nais do alumnado; ademais de servir de reforzo ó traballo feito polas criaturas no centro escolar.
Describe brevemente a innovación tecnolóxica	A autora emprega o blog como mecanismo de narración secuencial da experiencias da súa aula. Por unha banda, ofrece con todo luxo de detalles tanto as súas ideas educativas como o resultado das mesmas, servindo de diario de información para os pais e nais, de reforzo estimulante para o seu alumnado e de inspiración para o persoal que traballa no mundo educativo. Por outra banda ofrece información útil sobre o funcionamento da súa aula, os seus compoñentes, horarios, notas de interese; coas que se establece unha conexión  entre a escola e o fogar.
Describe brevemente a innovación metodolóxica	A innovación que ofrece este blog é de tipo comunicativa, posto que o obxectivo primordial é mellora-lo fluxo de comunicación entre a escola e o fogar. Así pois, non logra só crear un vínculo entre a comunidade educativa, senón que tamén serve de estímulo para os propios educandos. Quizais neste caso en concreto, non se aprecia unha comunicación dialóxica, na que os pais e nais podan contribuír á mellora educativa; existindo unha maior interacción entre profesionais que se retroalimentan entre si.
Outros datos de interese	A dedicación permanente e meticulosa favorece o seu seguimento e contribúe a facer deste blog unha fonte constante de inspiración para diversas actividades na aula.

BOAS PRÁCTICAS EN INNOVACIÓN EDUCATIVA CON TIC
Título da experiencia			Proyecto Pasapalabra
Autoría	Verónica Medina Suárez (Mestra do alumnado de 5º e 6º de primaria do  centro Marpe Altavista, de Las Palmas de Gran Canaria)
	Páxina web (URL)	Proyecto Pasapalabra http://pasapalabras.webnode.es/
	Artigo, publicación (indicar localización)	Proxecto desenvolto mediante a plataforma Webnode.
Destinatarios	Destinado a tódolos centros interesados en participar na creación de preguntas e respostas para implementa-la plataforma. Pode xogar calquera persoa.
Describe brevemente a innovación tecnolóxica	Configura unha rede de centros creando un vínculo motivacional coa creación dun xogo fora do ámbito académico, pero cun contido claramente curricular. Adapta o contido dun programa televisivo a unha plataforma na internet.
Describe brevemente a innovación metodolóxica	Trátase da creación dunha rede de aprendizaxe, vinculando a todos aqueles centros que teñan interese en participar na creación do xogo. Polo tanto non só permite aprender a través do xogo, senón que tamén ofrece a posibilidade de participar na súa creación recoñecendo a súa autoría. O alumnado participa de forma activa no proceso, tanto na creación como no desfrute.
Outros datos de interese	Para nós, é un exemplo da transformación do proceso de ensinanza-aprendizaxe a través do xogo.

Deseñando o noso póster sobre a Cultura Castrexa!

Boas camaradas!

Na primeira sesión coa nosa nova mestra Esther, comezamos a perfilar o noso novo proxecto que, como xa vos comentamos na entrada anterior, versa sobre a Cultura Castrexa. Para facer unha primeira achega, comezamos investigando os recursos xa existentes na rede sobre esta materia, e atopamos verdadeiros tesouros! 😍

Estes recursos son moi variados, e van dende un blog creado por un mestre de primaria do CEIP Graxal, ata un catálogo dos castros da comarca de Ferrol, pasando pola experiencia creativa do alumnado do CRA de Rianxo ou o espléndido recurso multimedia creado por Mari Álvarez, unha mestra do CEIP Sangriña.

No canto de plasmar aquí unha listaxe de links sen gracia, Esther instounos a deseñar un póster interactivo multimedia empregando Glogster, unha ferramenta da web 2.0, é dicir, aberta, gratuita (na súa versión máis básica), con espírito de traballo cooperativo e colaborativo, e multimedia. Glogster non soamente nos permite imprir o noso traballo, senón que tamén o podemos insertar nunha web ou empregalo na clase mediante unha PDI.

Estamos seguras de que estades impacientes por ve-lo noso traballo, así que non vos imos facer esperar máis e invitámosvos a premer na imaxe inferior para descubrilo! Non vos deixedes levar pola timidez e plasmade a vosa opinión nos comentarios!

Un saúdo e ata a próxima! 😜

Fin da primeira parte!

Boas camaradas!

Como ben reza o título desta entrada, comezamos unha nova etapa na nosa experiencia académica coas TIC. Hoxe foi a nosa primeira sesión coa nosa nova mestra Esther Martínez.

Así pois, despois de dous meses cursando esta materia, hoxe queremos adicar esta entrada a facer unha valoración da mesma, atendendo ós métodos e ós contidos. O fluxo de traballo nas sesións con Paz era case sempre o mesmo: unha pequena guía motivacional da nova aplicación que íamos coñecer, unha indicación un pouco máis exhaustiva dos obxectivos a conseguir e por último a súa titorización durante o noso proceso de creación. Como xa comentamos nesta entrada anterior, valoramos enormemente a paciencia da nosa mestra, quen nos acompañou no noso proceso de iniciación ás TIC. A metodoloxía empregada por ela posibilitaba coñecer a ferramenta a empregar mediante a creación dun proxecto ou actividade, non soamente as súas características teóricas, é dicir, para nós a principal vantaxe do método de Paz foi a posibilidade de crear e sentir en primeira persoa as posibilidades, eficacia, accesibilidade e demais características das ferramentas traballadas.

Se nos centramos agora nos contidos, ámbalas dúas estamos de acordo en que tódalas aplicacións que coñecemos son moi interesantes e ofrecen un gran abano de posibilidades. Xunto con este pensamento, axuntamos un sentimento de descoñecemento total do mundo das TIC na educación; o que queremos dicir é que nunca pensamos que houbese tal cantidade de aplicacións abraiantes e funcionais, a partes iguais. Estamos marabilladas e moi contentas e conformes con todo o aprendido.

O único que podemos dicir con respecto ás vindeiras sesións coa nosa nova profesora Esther é que independentemente de que muden a metodoloxía e os contidos, esperamos que o fluxo de traballo siga xerando en nós motivación intrínseca, e vaia acompañado dun certo grao de liberdade á hora de experimentar, o que permite creacións moito máis vencelladas coas creadoras: nós.

Para rematar, queremos compartir con vós que nesta nova etapa que comezamos na materia de Novas Tecnoloxías, imos ter que realizar un novo proxecto baixo a tutela da nosa mestra Esther. A temática que imos traballar pertence á area das Ciencias Sociais e trata sobre os castros da Galiza. 

Seguiremos informando! 😉

🚨🚧Construíndo a web do noso proxecto!🚧🚨

Ola camaradas!

Na última sesión coa mestra Paz 😢, creamos a nosa propia páxina web! Vaia salto!😲 A plataforma online que estamos a empregar é weebly, adicada á creación de páxinas web tanto gratuitas como de pago. A pesares de que o seu funcionamento é moi intuitivo e conta cunha ampla gama de plantillas e posibles modificacións que axudan a customiza-la web ó noso antollo, para que a derradeira experiencia con Paz non fose a excepción á norma, tamén nos custou un pouco arrincar e tomar as primeiras decisións de deseño. Se queredes indagar no mundo das páxinas web, deixámosvos un enlace co equipo de Website ToolTester que vos ofrece comparativas dos que consideran mellores sitios para iniciarse nesta actividade.

Afrontar a creación dunha páxina web fixo que nos somerxeramos nun mundo descoñecido para nós, tanto no que respecta a cuestións visuais ou de deseño, como a cuestións funcionais ou de manexo. Como sempre que un comeza a traballar cunha ferramenta nova, fomos descubrindo pouco a pouco as posibilidades que nos ofrece. Aínda así, tivemos axuda, xa que atopamos diversos tutoriais e materiais orientativos que nos facilitaron moito a tarefa. Podedes consultar ditos tutoriais aquí.

Para ir creando ambiente, contarémosvos que o obxectivo da páxina será expoñer o proxecto amplificado con TIC que estamos preparando para un grupo de crianzas de 3º de Educación Primaria. Se lle queredes ir botando un ollo, non tedes máis que premer no nome do proxecto que vos expoñemos a continuación: faunAPP

Gustaríanos moito que participarades na súa creación por medio de preguntas, críticas construtivas e suxerencias. 
Un saúdo e ata a próxima! 😎

Así empezou todo...

Ola camaradas:
Nesta entrada queremos empezar a expoñer o deseño do noso Proxecto: unha Tarefa Integrada amplificada con TIC. 

Como bo traballo que se precie, comezamos por unha fase de investigación, indagando nos gustos, afeccións, medos, intereses e preocupacións das crianzas que temos ó noso redor. Despois de interactuar coas criaturas de forma illada, para lograr ganarnos a súa confianza 😏, escoitamos todo o que nos tiñan que dicir para sacarlle o máximo partido de cara ó noso proxecto.  É ben certo que as meniñas e os meniños se dispersan nun amplo espectro de asuntos que son difíciles de plasmar nestas liñas. A grosso modo, os temas que máis non chamaron a atención foron os seguintes:

➽En primeiro lugar os videoxogos, nos diferentes formatos correspondentes: tablet, consola, smartphone, …

➽Por outra banda tamén nos falaron de certos alimentos pracenteiros que teñen restrinxidos: golosinas, doces, …, en definitiva alimentación de dubidoso valor nutricional pero de adición desmedida.

➽Outro tema polo que mostraron preocupación e ansia foron os dispositivos móbiles, a necesidade de posuír un, de custodialo e posuílo como ben persoal, que non deban de compartir con ninguén e do que non deban de render contas.

➽Finalmente, o tema que máis espertou o noso interese foi o medo, nos seus diversos orixes: medo á perda dalgún ser querido, medo a seres fantásticos que se lle aparecen en pesadelos difíciles de esquecer, e por último: medo a sons naturais e descoñecidos que os abordan en momentos de soidade, como pode ser o do preludio ó sono.

Unha vez sintetizadas as manifestacións dos cativos e das cativas, pensamos en que gustos ou afeccións podiamos ter en común nolas dúas... 🙊 ? 🙊. Unha de costa e a outra de interior; unha involucrada con todo o que oe, ve e escoita e a outra neutra por natureza... 😱 O certo é que resultou máis fácil do que poda parecer: a natureza, o amor pola terra, e por suposto o amor pola natureza da nosa terra. Así pois, fixamos como obxecto do noso proxecto algún elemento da natureza que poda ir vinculado cos intereses das criaturas.

Por último, quixemos engadir algún compoñente social; algún elemento da actualidade co que poidamos traballar e involucrar ó alumnado para facelo partícipe da mesma. Partindo do elemento central prefixada: a natureza, resultounos fácil verlle a utilidade tanto na concienciación como na necesidade de acción, o que o noso adorado Paulo Freire chamaría concientización. Aínda que neste caso, por proximidade, sexa aplicado ós ecosistemas da nosa contorna. Trátase dun tema que afecta en gran medida á nosa existencia, e que está de rabiosa actualidade, como podemos comprobar tanto en diarios do país coma de tirada nacional:

El aire de Galicia aprueba en dióxido de carbono pero catea en partículas - EL CORREO GALLEGO
Recogida de algas y contaminación de la ría - FARO DE VIGO
Animales en peligro de extinción - EL PAÍS

Así pois, decidimos centrarnos na área de Ciencias da Natureza para crear un proxecto integrado amplificado con TIC, no que imos traballar as diferentes especies animais da nosa contorna para poder amosalas á comunidade e deste xeito implicar a máis actores no seu coidado.  A finalidade do noso proxecto é crear un catálogo de Realidade Aumentada sobre os animais do noso ecosistema. O fluxo de traballo do noso proxecto comezaría implicando ó estudantado no mesmo, e reflexionando de xeito conxunto con eles sobre os coñecementos que xa temos e os que, pola contra, queremos adquirir. Chegados a este punto, empregaremo-las TIC para buscar información, e unha vez estruturada a mesma, deseñaremos e elaboraremos o catálogo. Unha segunda fase deste proxecto sería solicitar a colaboración doutros centros (nacionais ou internacionais) que tamén haxan creado o seu propio catálogo de animais da súa contorna, para así poder intercambialos e coñecer tamén a fauna doutros ecosistemas alleos a nós.

Somos conscientes de que é un proxecto moi ambicioso, pero nolas dúas somos da idea de que non existen proxectos demasiado grandes, senón vontades pequenas.

A ver que tal nos queda...😉

Ser quen de abri-la porta ás TIC

Boas, colegas da rede!
Despois de levar preto de mes e medio comezando a somerxernos neste océano que son as aplicación educativas e o seu amplo uso, estamos a ser conscientes do necesario que é un espazo de formación para o persoal docente. Non só formación previa, durante o estudo do grao, senón unha formación permanente e continuada, que non dependa soamente das inquedanzas e tempo dispoñible por parte dos mestres e das mestras. O que queremos dicir, é que se require unha guía, unha orientación necesaria, que axude a descubrir mundos de creatividade e innovación ocultos baixo a máscara do uso improdutivo das TIC.

Imaxinamos que no día a día de calquera persoa adicada ó campo da docencia, os tiras e afrouxas que xorden da interacción diaria, a carga de traballo académico e burocrático poden quitar as ganas de tontear (se se nos permite a expresión) coas TIC.

A primeira barreira que temos que sortear é o medo a explorar, a buscar, a errar; en definitiva, a aprender. De seguro, ás persoas que se senten máis cómodas coa tecnoloxía cóstalles entender do que estamos a falar. Pois ben, dende aquí queremos romper unha lanza a favor de todas aquelas persoas que se sinten intimidadas á hora de achegarse a este mundo: infinito en contidos, pero tamén en posibilidades. O medo, dicía unha querida amiga de Cris, garda as viñas, pero o medo entre dous tamén se leva mellor: calquera camiño é máis sinxelo de percorrer cando un o fai acompañado 😉. Por este motivo, é moi importante achegar esta nova visión das tecnoloxías facéndoa máis palpable ás mans das persoas fóbicas e/ou profanas na materia, axudando a franquea-la barreira dende unha práctica guiada, orientada e sobre todo animada.

Si; isto é algo no que levamos cavilando dende hai uns días: a importancia de que alguén, ben sexa docente (coma no noso caso), ben sexa compañeiro ou compañeira, axude a abri-la porta do novo mundo; e unha vez dentro, sen medo a aprender, nos podamos somerxer ó noso gusto e interese.

Se algo aprendemos ata agora é que o máis difícil sempre é comezar, de aí que consideremos moi importante o acompañamento nese primeiro paso, como quen acompaña a unha crianza da man nos seus primeiros pasos, ou como quen fai que terma polo ventre ó nadador que comeza a bracear. Non convén esquecer que somos seres humanos, sociais por natureza: aproveitémolo!

E vós? Quen vos axudou a comezar esta andaina? Compartide con nós as vosas experiencias!

Imaxinando a docencia con PicPac!

Ola camaradas!

A sesión de hoxe foi realmente estimulante e motivadora: puidemos misturar as nosas habilidades manuais co emprego das TIC mediante a aplicación PicPac! Esta aplicación está dispoñible tanto para Android como para iOS.

Permite levar a cabo tódolos pasos da producción, dende a montaxe das imaxes, a locución ou incluso a música de fondo. Para as persoas profanas na materia, queremos explicar o termo Stop Motion, que se refire a cando a animación non é un debuxo animado, senon que se lle da vida a obxectos de todo tipo, como maquetas ou bonecos (articulados ou de plastilina) mediante imaxes tomadas por fotografía ou filmación, empregando a técnica de "fotograma a fotograma" ou "cadro a cadro", tal e como explican neste blog de educación e cine.

Neste tipo de películas, as figuras vanse transformando ou movendo no progreso da animación paso a paso, creando así a sensación de movemento, polo que é un proceso moi laborioso. Como exemplo icónico, non podemos deixar de citar a marabillosa obra de arte creada por Tim Burton: Pesadilla antes de Navidad. 

A nosa obra de arte non se pode comparar cunha creación que levou 3 anos realizar, pero pensamos que amosa dun xeito claro a nosa concepción da docencia e o que nos gustaría chegar a aportar á sociedade por medio da nosa profesión.

O fluxo de traballo para este producto comezou coas indicacións da nosa profesora, que nos indicou que debíamos crear un busto que representara á docente que queremos ser. O primerio que fixemos foi chegar a un acordo sobre aqueles elementos clave na nosa concepción da educación, é dicir, aquilo que non podería faltar nunha aula. Así, coincidimos en que valores tales como a empatía, a cooperación e a solidaridade, e emocións como a alegría non podían faltar! Ademáis, incluímos debuxos de diferentes bonecos, xoguetes, animais, e todo tipo de estímulos que forman parte da vida das crianzas no seu día a día.

A continuación compartimos con vós o resultado. Que vos parece? Que incluiríades vós? Quitaríades algo?

Por se o noso traballo non vos convence (😂), estivemos navegando pola rede, e atopamos varios exemplos interesantes. O primeiro deles levouse a cabo no taller de Stop Motion do colexio Ártica, en Madrid. O alumnado de 5º de Primaria deste centro, organizado por grupos, realizou curtometraxes de temática variada empregando materiais da aula. A continuación deixámosvos o link por se queredes desfrutar deles.

Volvendo agora á terriña, temos o exemplo do IES As Barxas (Moaña), que realizaron unha serie de curtometraxes con plastilina co fin de crear os títulos de crédito para o lema: "8 de Marzo, Día da Muller Traballadora", tal e como vos amosamos nesta ligazón.

Por último, non queremos deixar de amosarvos o traballo realizado polo profesor de Debuxo, Artes Plásticas e Audiovisuais do IES María Soliño (Cangas do Morrazo), Jose Manuel García Plazuelo, autor da páxina Stop Motion Now. Este mestre, realiza un taller de Stop motion durante os recreos, e aínda que no seu caso está enfocado ó alumnado de Secundaria e Bacharelato, os titoriales que recopila no seu blog poden axudarnos a materializar as nosas ideas na creación de contidos para o alumnado de Primaria.

A pesar de que tódolos exemplos están enfocados ás artes plásticas e audiovisuais, a nos ocórrensenos outros tipos de usos tales como a explicación de procesos naturais (como por exemplo o percorrido que fai o bolo alimenticio por dentro do organismo), para matemáticas (facendo visuais as operacións numéricas implícitas nas tablas de multiplicar), ou mesmo para crear cohesión na aula mediante proxectos lonxitudinais onde todo o alumnado esté incluído (ir tirando unha foto das crianzas tódolos días para ó final do curso poder facer un video coa súa evolución), etc.

Que outras aplicacións se vos ocorren a vós, camaradas blogueiros? Non sexades tímidos e partillade con nós as vosas ideas e inquedanzas! Estaremos encantadas de respostarvos!😍